بیسٹ وے آٹوموٹیو پاکستان میں جی لی کی واحد مجاز ڈسٹری بیوٹر ہوگی، جو گاڑیوں کی فروخت، برانڈ کے فروغ اور فروخت کے بعد صارفین کو خدمات کی فراہمی کی ذمہ داریاں سنبھالے گی۔
اسلام آباد : بیسٹ وے گروپ نے چین کی معروف آٹوموبائل کمپنی جی لی آٹو (Geely Auto) کو پاکستان میں باضابطہ طور پر متعارف کرا دیا۔ اسلام آباد کے پارک ویو سٹی میں منعقدہ تقریب میں گروپ کے بانی سر محمد انور پرویز، گروپ کے چیئرمین لارڈ ضمیر چودھری اور دونوں اداروں کے اعلیٰ عہدیداروں، صنعتی شعبے کی نمایاں شخصیات، معزز مہمانوں اور میڈیا نمائندوں نے شرکت کی۔ اس اقدام کے ذریعے بیسٹ وے گروپ نے آٹوموبائل کے شعبے میں قدم رکھتے ہوئے جی لی کی جدید انجینئرنگ، ٹیکنالوجی اور گاڑیوں کی مختلف اقسام پاکستانی مارکیٹ میں متعارف کرانے کا اعلان کیا۔
بیسٹ وے آٹوموٹیو پاکستان میں جی لی کی واحد مجاز ڈسٹری بیوٹر ہوگی، جو گاڑیوں کی فروخت، برانڈ کے فروغ اور فروخت کے بعد صارفین کو خدمات کی فراہمی کی ذمہ داریاں سنبھالے گی۔ اس شراکت داری کے تحت پاکستان میں گاڑیوں کی مقامی اسمبلنگ کی راہ بھی ہموار ہوگی۔ بیسٹ وے گروپ نے جی لی کے آئندہ آپریشنز کے لیے کراچی میں اپنی تنصیب کو تیار کرنا شروع کر دیا ہے۔
یہ بھی پڑھیں: یوفون نے ڈریگنز آف ایشیا 2026 میں دو ایوارڈز جیت کر عالمی پذیرائی حاصل کرلی
جی لی آٹو کی عالمی برانڈ حکمت عملی کا نظریہ ’’دنیا کو مکمل طور پر دیکھیں‘‘ہے، جو اس تصور کی عکاسی کرتا ہے کہ نقل و حرکت محض ایک جگہ سے دوسری جگہ پہنچنے کا نام نہیں بلکہ بہتر تجربات، نئے امکانات اور مختلف زاویہ ہائے نظر دریافت کرنے کا ذریعہ بھی ہے۔ کمپنی انجینئرنگ، ٹیکنالوجی اور ڈیزائن کو یکجا کرکے ایسی سہولیات فراہم کرنا چاہتی ہے جن سے لوگوں کو اپنے اردگرد کی دنیا کو بہتر انداز میں دیکھنے اور دریافت کرنے کا موقع ملے۔
اس موقع پر بیسٹ وے گروپ پاکستان کے نان بینکنگ کاروبار کے گروپ منیجنگ ڈائریکٹر عرفان شیخ نے کہا کہ جی لی کے ساتھ شراکت داری بیسٹ وے گروپ کے لیے باعث فخر ہے۔ اس اشتراک میں دونوں اداروں کی صلاحیتیں یکجا ہوئی ہیں۔ بیسٹ وے پاکستان میں کئی دہائیوں سے سرمایہ کاری اور کاروبار کی ترقی کا تجربہ رکھتا ہے، جبکہ جی لی عالمی آٹوموبائل صنعت میں اپنی مہارت اور ٹیکنالوجی کے لیے معروف ہے۔ ہمیں خوشی ہے کہ پاکستانی مارکیٹ میں جی لی کے تین ماڈلز، ای ایکس 2 (EX2)، ای ایکس 5 (EX5) اور اسٹارے ای ایم آر (Starray EM-R) متعارف کرائے گئے ہیں۔ ان گاڑیوں کی رونمائی اس سفر کا پہلا اہم مرحلہ ہے۔ کمپنی کا ہدف ہے کہ آئندہ چند ماہ میں مقامی طور پر اسمبل کی گئی جی لی گاڑیاں پاکستان کی سڑکوں پر رواں دواں ہوں۔ انہوں نے کہا کہ اس شراکت داری میں نمایاں امکانات موجود ہیں اور بیسٹ وے گروپ پاکستان میں جی لی کو ایک معروف اور قابل اعتماد برانڈ بنانے کے لیے پرعزم ہے۔
جی لی کے تینوں ماڈلز مختلف ضروریات کو مدنظر رکھتے ہوئے تیار کیے گئے ہیں۔ جی لی ای ایکس 2شہری علاقوں میں سفر کے لیے چھوٹی، مکمل الیکٹرک ہیچ بیک گاڑی ہے، جبکہ ای ایکس 5مکمل الیکٹرک ایس یو وی ہے۔ اسٹارے ای ایم آر میں رینج ایکسٹینڈڈ الیکٹرک وہیکل (REEV) ٹیکنالوجی استعمال کی گئی ہے، جو الیکٹرک موٹر کے ذریعے سفر کے ساتھ گاڑی میں موجود پیٹرول انجن کی مدد سے اضافی سفری گنجائش فراہم کرتی ہے۔
بیسٹ وے گروپ کے گروپ چیف ایگزیکٹو آفیسر حیدر چودھری نے کہا کہ جی لی کی پاکستان آمد ملک کے ساتھ بیسٹ وے کی دیرینہ وابستگی میں ایک اہم سنگ میل ہے۔ سیمنٹ سازی اور بینکاری سمیت مختلف شعبوں میں سرمایہ کاری کے ذریعے بیسٹ وے پاکستان میں 35کروڑ ڈالر سے زیادہ کی سرمایہ کاری کر چکا ہے۔ صرف گزشتہ تین برسوں میں اس کی سرگرمیوں سے 20ہزار سے زائد ملازمتیں پیدا ہوئیں اور لوگوں کے روزگار کو سہارا ملا۔ بیسٹ وے آٹوموٹیو کے قیام سے گروپ اپنی سرمایہ کاری کو آٹوموبائل شعبے تک وسعت دے رہا ہے۔ جی لی کے ساتھ شراکت داری مقامی پیداوار، روزگار کے مواقع، فنی مہارتوں کی ترقی اور آٹوموبائل صنعت کی سپلائی چین کو مضبوط بنانے میں مدد دے گی، جبکہ پاکستانی صارفین کو عالمی معیار کی آٹوموبائل ٹیکنالوجی اور گاڑیوں کے زیادہ انتخاب کی سہولت میسر آئے گی۔
یہ بھی پڑھیں: پی ٹی سی ایل کے سماجی ترقی کے دو منصوبوں نے ڈریگنز آف ایشیا ایوارڈز 2026 میں اعزازات حاصل کر لیے
جی لی آٹو آسیان کے منیجنگ ڈائریکٹر اور GAICکے نائب صدر ایون یے (Evin Ye) نے کہا کہ پاکستان جنوبی ایشیا میں جی لی کی پہلی مارکیٹ ہے اور کمپنی یہاں ترقی کے نمایاں امکانات دیکھتی ہے۔ انہوں نے کہا کہ بیسٹ وے گروپ مقامی مارکیٹ کو سمجھتا ہے اور صارفین کو بہتر سہولیات فراہم کرنے کے عزم میں جی لی کا شراکت دار ہے۔ یہ اشتراک محض کاروباری معاہدہ نہیں بلکہ طویل مدتی شراکت داری ہے، جس کا مقصد مشترکہ ترقی، صارفین کی معاونت کو مضبوط بنانا اور پاکستانی خاندانوں کو محفوظ، ذہین اور اعلیٰ معیار کی سفری سہولیات فراہم کرنا ہے۔
بیسٹ وے گروپ اور جی لی آٹو اس شراکت داری کے ذریعے صارفین کے ساتھ دیرپا تعلقات استوار کرنے اور پاکستان کی آٹوموبائل صنعت کی ترقی میں کردار ادا کرنے کے لیے پرعزم ہیں۔
