پی ٹی سی ایل نے مالیاتی اور مارکیٹنگ قیادت مضبوط بنا لی، دو اہم تقرریوں کا اعلان
اسلام آباد: پاکستان ٹیلی کمیونی کیشن کمپنی لمیٹڈ (پی ٹی سی ایل) نے اپنے بورڈ آف ڈائریکٹرز کی منظوری کے بعد دو اہم اعلیٰ سطحی تقرریوں کا اعلان کرتے ہوئے محمد عامر صدیقی کو چیف فنانشل آفیسر (سی ایف او) اور عماد خان کو چیف مارکیٹنگ آفیسر (سی ایم او) مقرر کر دیا ہے۔ دونوں افسران فوری طور پر اپنی ذمہ داریاں سنبھالیں گے۔
پی ٹی سی ایل کے نئے چیف فنانشل آفیسر محمد عامر صدیقی ایک فیلو چارٹرڈ اکاؤنٹنٹ ہیں اور مالیاتی انتظام، اسٹریٹجک منصوبہ بندی، ٹریژری، کارپوریٹ گورننس اور بزنس ٹرانسفارمیشن کے شعبوں میں 30 سال سے زائد کا وسیع تجربہ رکھتے ہیں۔ انہوں نے پاکستان اور بین الاقوامی سطح پر ٹیلی کمیونی کیشن اور مالیاتی اداروں میں اہم ذمہ داریاں نبھائی ہیں، جبکہ ارنسٹ اینڈ ینگ (EY)، ڈیلوئٹ، اتصالات اور پی ٹی سی ایل گروپ سمیت مختلف اداروں میں خدمات انجام دے چکے ہیں۔
عامر صدیقی 2013 سے 2022 تک پی ٹی سی ایل گروپ میں گروپ ایگزیکٹو وائس پریزیڈنٹ، فنانشل پلاننگ اینڈ ٹریژری کے طور پر خدمات سرانجام دیتے رہے، جبکہ بعد ازاں ہیڈ آف اسٹریٹجی اینڈ ٹرانسفارمیشن کی حیثیت سے ادارہ جاتی تبدیلی اور کاروباری ترقی کے متعدد منصوبوں کی قیادت کی۔ 2023 سے وہ یو مائیکروفنانس بینک کے چیف فنانشل آفیسر کے طور پر خدمات انجام دے رہے تھے، جہاں انہوں نے مالیاتی اور آپریشنل اصلاحات میں نمایاں کردار ادا کیا۔
چیف فنانشل آفیسر کی حیثیت سے وہ پی ٹی سی ایل کی مالیاتی حکمت عملی، سرمائے کی مؤثر تقسیم، مالیاتی کارکردگی، گورننس اور آپریشنل استعداد کو مزید مضبوط بنانے کی قیادت کریں گے۔
دوسری جانب عماد خان کو پی ٹی سی ایل کا چیف مارکیٹنگ آفیسر مقرر کیا گیا ہے۔ انہیں ٹیلی کمیونی کیشن، ٹیکنالوجی اور ڈیجیٹل ٹرانسفارمیشن کے شعبوں میں دو دہائیوں سے زائد کا تجربہ حاصل ہے اور وہ پاکستان، آسٹریلیا اور مشرق وسطیٰ میں مختلف اہم عہدوں پر خدمات انجام دے چکے ہیں۔
عماد خان نے پی ٹی سی ایل میں فائبر، وائس، ٹی وی، او ٹی ٹی اور آئی او ٹی سمیت وائر لائن پورٹ فولیو کے مختلف شعبوں میں کلیدی کردار ادا کیا۔ انہیں کمپنی کی فائبر حکمت عملی کی تشکیل اور ترقی کا اہم معمار سمجھا جاتا ہے، جس کے نتیجے میں پی ٹی سی ایل نے ملک کے نمایاں فائبر آپریٹر کے طور پر اپنی پوزیشن مزید مستحکم کی۔ پی ٹی سی ایل میں شمولیت سے قبل وہ آسٹریلوی کمپنی آپٹس سمیت متعدد بین الاقوامی اداروں میں بھی خدمات انجام دے چکے ہیں۔
ٹیلی نار پاکستان مسلسل تیسرے سال پی ٹی اے کی سائبر سیکیورٹی درجہ بندی میں نمبر 1 قرار
چیف مارکیٹنگ آفیسر کی حیثیت سے عماد خان برانڈ حکمت عملی، مصنوعات کی مارکیٹنگ، صارفین کے تجربے میں بہتری، ڈیجیٹل رابطہ کاری اور نئی سروسز کے فروغ کی قیادت کریں گے۔ ان کی توجہ کمپنی کی مارکیٹ پوزیشن مضبوط بنانے اور کنیکٹیویٹی و ڈیجیٹل سروسز کے شعبوں میں پائیدار ترقی کے حصول پر مرکوز ہوگی۔
پی ٹی سی ایل کا کہنا ہے کہ دونوں تقرریاں ایسے وقت میں کی گئی ہیں جب کمپنی خود کو ایک مربوط ٹیکنالوجی اور انفارمیشن اینڈ کمیونی کیشن ٹیکنالوجی (آئی سی ٹی) ادارے کے طور پر مزید مستحکم کرنے، تیز رفتار ڈیجیٹل رابطوں کو وسعت دینے اور صارفین کی بدلتی ضروریات کے مطابق جدید خدمات متعارف کرانے کے لیے سرگرم عمل ہے۔
