کراچی، پاکستان کے معروف اسلامی بینک میزان بینک نے اسلامی مالیات کی تعلیم کو پاکستان سمیت عالمی سطح پر زیادہ قابلِ رسائی بنانے کے لیے لمز (LUMS) کے سینٹر فار اسلامک فنانس (CIF) کے ساتھ مفاہمتی یادداشت پر دستخط کیے ہیں۔ یہ شراکت داری میزان بینک کی صنعتی مہارت اور لمز کی علمی صلاحیتوں کو یکجا کرتے ہوئے اسلامی مالیاتی شعبے کے لیے مستقبل کے تقاضوں سے ہم آہنگ افرادی صلاحیتوں کی تیاری میں معاون ثابت ہوگی۔
اس شراکت داری کے تحت پہلے اقدام کے طور پر میزان بینک اور لمز مشترکہ طور پر "Learning from Leaders of Islamic Finance” کے عنوان سے ایک خصوصی آن لائن سرٹیفکیشن پروگرام متعارف کرائیں گے۔ اس پروگرام میں منظم نصاب، جامع جائزہ (Assessment) اور سرٹیفکیشن کے معیارات شامل ہوں گے، جس کے ذریعے شرکا اسلامی مالیات کے ممتاز ماہرین اور شعبے کے تجربہ کار پیشہ ور افراد کے تجربات سے مستفید ہو سکیں گے۔
یہ سرٹیفکیشن کورس لمز کے ڈیجیٹل لرننگ پلیٹ فارم LUMSx پر پیش کیا جائے گا، جس کے ذریعے اسلامی مالیات کی تعلیم کو آن لائن اور وسیع پیمانے پر زیادہ سے زیادہ افراد تک پہنچایا جا سکے گا۔
مفاہمتی یادداشت پر میزان بینک کے گروپ ہیڈ، ہیومن ریسورسز، لرننگ اینڈ آرگنائزیشنل ڈیولپمنٹ، خالد زمان خان اور لمز کے پرووسٹ ڈاکٹر طارق ایم جدون نے دستخط کیے۔ اس موقع پر دونوں اداروں کے سینئر عہدیدار بھی موجود تھے۔
اس موقع پر لمز کے پرووسٹ ڈاکٹر طارق ایم جدون نے کہا کہ اسلامی مالیات عالمی مالیاتی صنعت کے تیزی سے فروغ پانے والے شعبوں میں سے ایک ہے، جس کے باعث معیاری اور آسان قابلِ رسائی تعلیمی مواقع کی ضرورت بڑھتی جا رہی ہے۔ انہوں نے کہا کہ میزان بینک کے ساتھ اس اشتراک کے ذریعے علمی معیار اور صنعتی مہارت کو یکجا کرتے ہوئے مستقبل کے تقاضوں سے ہم آہنگ افرادی صلاحیتیں تیار کی جائیں گی اور اسلامی مالیات کے شعبے میں علم و تحقیق کو مزید فروغ دیا جائے گا۔
میزان بینک کے گروپ ہیڈ، ہیومن ریسورسز، لرننگ اینڈ آرگنائزیشنل ڈیولپمنٹ، خالد زمان خان نے کہا کہ اسلامی مالیات کا مستقبل ایسے پیشہ ور افراد کی تیاری سے وابستہ ہے جو ٹیکنیکل مہارت کے ساتھ ساتھ شریعہ اصولوں سے بھی گہری آگاہی رکھتے ہوں۔ انہوں نے کہا کہ لمز کے ساتھ یہ شراکت داری اسلامی مالیات کی تعلیم کے فروغ، شعبے کی پیشہ ورانہ صلاحیتوں میں اضافے اور ڈیجیٹل پلیٹ فارم کے ذریعے معیاری تعلیم کو زیادہ سے زیادہ افراد تک پہنچانے کے لیے میزان بینک کے عزم کی عکاسی ہے۔
یہ شراکت داری جامعات اور صنعت کے درمیان اشتراک کو مزید مضبوط بنانے کی جانب ایک اہم پیش رفت ہے، جس کے ذریعے اسلامی مالیات میں مہارت حاصل کرنے کے خواہشمند طلبہ اور پیشہ ور افراد کے لیے معیاری اور عملی تربیت کے نئے مواقع فراہم کیے جائیں گے۔
